၂၀၁၂ ခုနှစ် စက်တင်ဘာလ ၂၂ ရက် စနေနေ့တွင် နယူးယောက်မြို့ လောကချမ်းသာဘုရားကျောင်း၌ တစ်နာရီ တရားရှုမှတ်ခြင်း၊ ဓမ္မသင်တန်းများနှင့် တရားပွဲများကို ပြုလုပ်ရာ လောကချမ်းသာငါးမိနစ်တရားအဖြစ် လောကချမ်းသာဆရာတော်က ပညာဘူမိရောက်အောင် ကြိုးစား အားထုတ်ကြရန် မိန့်ကြား၏။

+++++
မွန်းလွဲ ၃း၁၅ နာရီမှ ၄း၁၅ နာရီ၊ ဓမ္မပဒသင်တန်းတွင် ဆရာတော် ဦးဥဂ္ဂပဏ္ဍိတက အပ္ပမာဒဝဂ်၊ ဂါထာ (၃၁) အညတရဘိက္ခုဝတ္ထုအကြောင်း သင်ကြားပေး၏။

+++++
ညနေ ၄ နာရီခွဲ အဘိဓမ္မာသင်တန်းတွင် ဆရာတော် အရှင်ဝဏ္ဏိတက ဘုံပိုင်း (ဝီထိမုတ်ပိုင်း)ကို ရှင်းပြ သင်ကြားပေး၏။

+++++
ယခုအပတ်တွင် သင်တန်းသား သင်တန်းသူ အချို့မှာ နံနက်စောစောပိုင်းမှ စ၍ အိမ်မှ ထွက်လာခဲ့ကြရာ ပင်ပန်းနေကြသဖြင့် လောကချမ်းသာ ဆည်းဆာတရားပွဲ မပြုလုပ်ဖြစ်ပေ။

ရန်ကုန်တိုင်း မှော်ဘီမြို့နယ် မင်္ဂလာတိုက် မိုးကုတ်ဝိပဿနာရိပ်သာနှင့် ဗုဒ္ဓသာသနအကျိုးတော်ဆောင်လုပ်ငန်း သုမင်္ဂလဖောင်ဒေးရှင်း၏ ဦးစီးနာယကဖြစ်သော ဆရာတော် ဦးသုမင်္ဂလ (ဒယ်အိုးဆရာတော်)သည် အမေရိကန် အရှေ့ပိုင်းသို့ ရောက်ရှိခိုက် နယူးယောက်မြို့ လောကချမ်းသာဘုရားကျောင်းတွင် ၂၀၁၂ ခုနှစ် စက်တင်ဘာလ ၂၁-ရက် သောကြာနေ့ ညနေ၌ `မျက်စောင်းလည်း မထိုးနဲ့၊ မျက်စလည်း မပစ်နဲ့´တရားတော်ကို ဓမ္မဒါနပြု ဟောကြားခဲ့၏။