၂၀၁၂ ခုနှစ် ဇူလိုင်လ ၂၈ ရက် စနေနေ့ ညနေ ၆-နာရီတွင် နယူးယောက်မြို့ လောကချမ်းသာဘုရားကျောင်း၌ လောကချမ်းသာဆည်းဆာတရားပွဲကို ပြုလုပ် ကျင်းပရာ ရန်ကုန်တိုင်း၊ လမ်းမတော်မြို့နယ်၊ သရက်တောကျောင်းတိုက်၊ အောင်စကြာတိုက်ကျောင်း ဦးစီး ပဓာနနာယက၊ မဟာဓမ္မကထိက ဗဟုဇနဟိတဓရ၊ အောင်စကြာဆရာတော် ဘဒ္ဒန္တစန္ဒသူရိယက “ကံလမ်းနှင့် ဉာဏ်လမ်း”တရားတော်ကို ဓမ္မဒါနပြု ဟောကြား၏။

တရားတော် လင်္ကာများ

ကံလမ်းကလျှောက်၊ သုဿာန်ရောက်မယ်။
ဉာဏ်လမ်းကလျှောက်၊ နိဗ္ဗာန်ရောက်မယ်။

ပြိတ္တာဘ၀၊ ရောက်ကြရ၊ လောဘကံကြောင့်ပါ။
ငရဲဘ၀၊ ရောက်ကြရ၊ ဒေါသကံကြောင့်ပါ။
တိရစ္ဆာန်ဘ၀၊ ရောက်ကြရ၊ မောဟကံကြောင့်ပါ။

လူနတ်ဘ၀၊ ရောက်ကြရ၊ ဒါနကံကြောင့်ပါ။
လူနတ်ဘ၀၊ ရောက်ကြရ၊ သီလကံကြောင့်ပါ။
ဗြဟ္မာဘ၀၊ ရောက်ကြရ၊ သမထကံကြောင့်ပါ။

နောက်ကိုပြန်ကြည့်၊ အစမသိ၊ မြုပ်ပေါ်ဖြစ်ခဲ့၏။
ရှေးကိုမျှော်ကြည့်၊ အဆုံးမသိ၊ မြုပ်ပေါ်ဖြစ်ဖို့ရှိ။

+++++

ဆိတ်ငြိမ်နေရာ၊ ချဉ်းကပ်ကာ၊ လျင်စွာ ရှုကာပွား။
တောနှင်သစ်ပင်၊ ကျောင်းအိမ်တွင်၊ အသင်ကြိုက်ရာသွား။
တင်ပလ္လင်ခွေ၊ ထိုင်ပါလေ၊ ခါးနေ ဖြောင့်အောင်ထား။
မျက်စိမှိတ်ကာ၊ ခေါင်းတည့်ပါ၊ စိတ်မှာ နှာသီးဖျား။
ထွက်တယ်ဝင်တယ်၊ သတိဆွယ်၊ မှတ်ကွယ် ယောဂီများ။
မလှုပ်ဣနြေ္ဒ၊ ငြိမ်ငြိမ်နေ၊ စိတ်တွေ မလွင့်ပါး။

ကာယကိုယ်မှာ၊ ရှုမှတ်တာ၊ ကာယာနုပဿနာသတိပဋ္ဌာန်။
ကောင်းဆိုးနှစ်ဖြာ၊ ရှုမှတ်တာ၊ ဝေဒနာနုပဿနာသတိပဋ္ဌာန်။
စိတ်ဖြစ်ပေါ်ရာ၊ ရှုမှတ်တာ၊ စိတ္တာနုပဿနာသတိပဋ္ဌာန်။
ကြားနံမြင်ရာ၊ ရှုမှတ်တာ၊ ဓမ္မနုပဿနာသတိပဋ္ဌာန်။

ကာယ,ဝေဒနာ၊ စိတ္တ,ဓမ္မာ၊ ဤလေးဖြာ၊ ပေါ်ရာ ရှုရမည်။