နယူးယောက်မြို့ လောကချမ်းသာဘုရားကျောင်းတွင် ၂၀၁၀ ခုနှစ် အောက်တိုဘာလ ၃၀ ရက် စနေနေ့ မွန်းလွဲ ၃ နာရီမှ ညနေ ၆ နာရီထိ အဘိဓမ္မာသင်တန်း၊ သုတ္တန်တရားတော်များ လေ့လာခြင်းသင်တန်းနှင့် ဆည်းဆာတရားပွဲတို့ကို ကျင်းပ ပြုလုပ်၏။

အဘိဓမ္မာသင်ခန်းစာများကို ပြန်လည် လေ့လာ သုံးသပ်ခြင်းအဖြစ် ပကိဏ်းပိုင်း ဒွါရသင်္ဂဟကို မူလပဋ္ဌာန်းဆရာတော်ဘုရားကြီး၏ သင်ကြားပို့ချချက်ဇယားနှင့် ဆိုရိုးများဖြင့် မွန်းလွဲ ၃ နာရီမှ ၄ နာရီထိ လောကချမ်းသာဆရာတော်က ပြန်လည် သင်ကြား ပို့ချပေး၏။

ထိုနောက် ၁၀ မိနစ်ခန့် အနားပေးပြီး၊ လောကချမ်းသာဆရာတော်ကပင် မဟာသတိပဋ္ဌာနသုတ်ကို နာရီဝက်မျှ သင်ကြား ပို့ချပေး၏။ မဟာသတိပဋ္ဌာနသုတ်သင်တန်း ပထမဆုံး ပို့ချချက်အနေဖြင့် မဟာသတိပဋ္ဌာနသုတ်တော်ကြီးကို အသံထွက်မှန်မှန်ကန်ကန် အဖြတ်အတောက် မှန်မှန် ရွတ်ဖတ် ပူဇော်တတ်စေလိုသောကြောင့် ရွတ်ဖတ်နည်းကို စတင် ပို့ချ သင်ကြားပေး၏။

ညနေ ၅ နာရီမှ ၆ နာရီအထိ လောကချမ်းသာ စနေနေ့ ဆည်းဆာတရားပွဲကို ပြုလုပ်ရာ မလေးရှားနိုင်ငံမှ ခေတ္တ ရောက်ရှိနေသော ဆရာတော် အရှင်နန္ဒဝံသက “ကုသိုလ်သည်သာ ကိုယ့်ရိက္ခာ”ဟူသော တရားတော်ကို တိုတိုကျဉ်းကျဉ်း ထိထိမိမိ မှတ်ဖွယ်ရာရာ လင်္ကာများဖြင့် ဟောကြား ချီးမြှင့်သွား၏။

လင်္ကာများ

ဤလူ့ဘဝ၊ လာခဲ့ရ၊ ခဏလေးသာ ဖြစ်သည်။
ခဏလေးလာ၊ ဧည့်သည်မှာ၊ ပြန်ကာ သွားရမည်။

လူဖြစ်ရတဲ့၊ ဒီချိန်ခါ၊ ရွှေတံခါးကြီး ဖွင့်ရမှာ/ကိုယ်ကျင့်သီလ တည်ရမှာ။
ရွှေငွေရတနာ၊ ဆိုတာများ၊ ဘုရားဟောလို့ ရှိခဲ့သား။

ယုံကြည်မှုကွဲ့၊ မြတ်သဒ္ဓါ၊ ကိုယ်ကျင့်သီလ တည်ရမှာ။
ရှက်တာကြောက်တာ၊ ကိုယ်မှာထား၊ သုတရှိအောင် သင်ကြိုးစား။

ပေးကမ်းခြင်းရဲ့၊ စေတနာ၊ ဒါနကိုလည်း ပြုရမှာ။
ဤအင်္ဂါစုံသူများ၊ ဘေးရန်ကင်းပေါ့၊ အသင်/အို လူသား။

အနှစ်နံ့သာ၊ အားလုံးမှာ
ကောင်းတာ အမြတ်ဆုံး၊ ကရမက်တုံး။

အမွှေးနံ့သာ၊ အားလုံးမှာ
ကောင်းတာ အမြတ်ဆုံး၊ စန္ဒကူးတုံး။

အပွင့်နံ့သာ၊ အားလုံးမှာ
ကောင်းတာ အမြတ်ဆုံး၊ မြတ်လေးကုံး။

ဗုဒ္ဓ ဓမ္မ၊ သြဝါဒ
နေ့ညစွဲသုံး၊ အမြတ်ဆုံး။

တရားကရမက်၊ လိမ်းကျံလျက်၊ နံ့သက်ကိလေ ပျောက်ပါစေ။
တရားစန္ဒကူး၊ လိမ်းကျံလူး၊ ညစ်ကျူးကိလေ ပျောက်ပါစေ။
တရားမြတ်လေး၊ ပန်ဆင်မွှေး၊ ညစ်ကြေးကိလေ ပျေက်ပါစေ။

တရားပွဲပြီးသော် ငါးမိနစ်မျှ တရားရှုမှတ် ပွားများကြပြီး၊ ကုသိုလ်ကောင်းမှု အပေါင်းအစုတို့ကို ဝေနေယျသတ္တဝါအများတို့အား အမျှပေးဝေကြလေသည်။

သာဓု … သာဓု … သာဓု။