၂၀၁၁ ခုနှစ် မေလ ၇ ရက် စနေနေ့တွင် နယူးယောက်မြို့ လောကချမ်းသာဘုရားကျောင်း၌ မွန်းလွဲ ၂ နာရီမှ ၃ နာရီအထိ တရားရှုမှတ်ခြင်း၊ မွန်းလွဲ ၃ နာရီခွဲမှ ၄ နာရီခွဲအထိ လောကချမ်းသာဆရာတော် ပို့ချ သင်ကြားပေးသော အဘိဓမ္မာနှင့် ဓမ္မပဒသင်တန်း အပတ်စဉ် (၁)ကို လေ့လာသင်ယူကြခြင်း၊

ညနေ ၅ နာရီမှ ၆ နာရီအထိ မြန်မာနိုင်ငံမှ ၂၀၁၁ ခုနှစ် ဧပြီလ ၂၈ ရက်နေ့တွင် ရောက်ရှိလာသော ချောက်မြို့၊ အေးစေတီရပ်၊ မဟာဝိဇိတာရုံ ဆင်ဖြူကျွန်းကျောင်းတိုက်၏ ပဓာနနာယက အဂ္ဂမဟာပဏ္ဍိတ ဘဒ္ဒန္တဉာဏိန္ဒဆရာတော်ဘုရားကြီး၏ “နိဗ္ဗာနပဉှာသုတ္တန်တရားတော်”ကို နာယူကြခြင်း ကောင်းမှု ကုသိုလ်များကို ပြုလုပ် ဆည်းပူးကြ၏။

နိဗ္ဗာန်ဆိုတာ၊ ဘယ်လိုဟာ၊ ဘာကိုခေါ်သနည်း?
ရာဂကုန်ရာ၊ နိဗ္ဗာန်ပါ၊ သေချာမှတ်လေတည်း။
ဒေါသကုန်ရာ၊ နိဗ္ဗာန်ပါ၊ သေချာမှတ်လေတည်း။
မောဟကုန်ရာ၊ နိဗ္ဗာန်ပါ၊ သေချာမှတ်လေတည်း။
ရာဂ, ဒေါသ, မောဟ ကုန်ရာ၊ နိဗ္ဗာန်ပါ၊ သေချာမှတ်လေတည်း။

နိဗ္ဗာန်ရောက်ရာ၊ အကျင့်မှာ၊ ထင်စွာရှိသလား?
နိဗ္ဗာန်ရောက်ရာ၊ အကျင့်မှာ၊ ထင်စွာအရှိသား။

နိဗ္ဗာန်ရောက်ရာ၊ အကျင့်မှာ၊ ဘယ်ဟာပါတဲ့နည်း?
နိဗ္ဗာန်ရောက်ရာ၊ အကျင့်မှာ၊ ရှစ်ဖြာမဂ္ဂင်တည်း။

မဂ္ဂရှစ်ဖြာ၊ အနှစ်မှာ၊ ဘယ်ဟာပါတဲ့နည်း?
သီလသမာ၊ ဓိပညာ၊ ရှစ်ဖြာမဂ္ဂင်အနှစ်တည်း။

သာဓု … သာဓု … သာဓု။