လူတယောက် ကြီးပွားတိုးတက်ဖို့အတွက် အမှီကောင်းရှိဖို့လိုတာ အမှန်ပါ။

အမှီကောင်းရှိမှသာ လောကီ လောကုတ္တရာ ကြီးပွားတိုးတက်မှုတွေကို ရရှိခံစားနိုင်ပါတယ်။

“ဘုရားတောင် အမှီရှိမှ ပွင့်နိုင်တယ်”ဆိုတဲ့ စကားဟာ အမှီကောင်းအရေးကြီးပုံနဲ့ ပတ်သက်ပြီး ပြောဆိုတဲ့ စကားတခု ဖြစ်ပါတယ်။

ဒီနေရာမှာ ဘုရားရှင်ရဲ့ အမှီကောင်းဆိုတာ မဟာဗောဓိပင်နဲ့ ရွှေပလ္လင်ကို ပြောပုံရပါတယ်။

ဗုဒ္ဓမြတ်စွာဟာ မဟာဗောဓိပင်ကြီးအောက်မှာ ထိုင်၍ “ငါ ဘုရားမဖြစ်မချင်း ဒီနေရာက မထတော့”လို့ အဓိဋ္ဌာန်ပြုပြီး တရားအားထုတ်ခဲ့ရာ မဟာသက္ကရာဇ် (၆၈)ခုနှစ် ကဆုန်လပြည့်နေ့မှာ သဗ္ဗညုဘုရား စင်စစ် ဧကန်ဖြစ်တော်မူခဲ့ပါတယ်။

ကြီးပွားတိုးတက်နေသူ ရဟန်းရှင်လူတိုင်းပင် အမှီကောင်းရှိကြလို့ တိုးတက်ကြီးပွားနေခြင်း ဖြစ်ပါတယ်။

မိမိဟာ အကြီးအကျယ် အောင်မြင်နေတဲ့ ပုဂ္ဂိုလ်တဦးတော့ မဟုတ်ပါ။ ဒါပေမယ့် မိမိဉာဏ်မှီသလောက် သာသနာတော်အကျိုး လောကအကျိုး သည်ပိုး ဆောင်ရွက်ရာမှာ အမှီကောင်းများရဲ့ ကျေးဇူးတွေကြောင့် အထိုက်အလျောက် အောင်မြင်မှု မှတ်တိုင်ကလေးများကို စိုက်ထူနိုင်ခဲ့ပါတယ်။

အဲဒီ အမှီကောင်းများကတော့ မိမိရဲ့ ဆရာသခင် ကျေးဇူးရှင်တွေပဲ ဖြစ်ပါတယ်။

မိမိမှာ “လက်ဦးဆရာ မည်ထိုက်စွာ၊ ပုဗ္ဗာစရိယ မိနှင့်ဘ”ဆိုတဲ့အတိုင်း မိဘနှစ်ပါးအပါအဝင် ဆရာသခင် ကျေးဇူးရှင်တွေ အတော်များများ ရှိခဲ့ပါတယ်။

ဒီနေရာမှာတော့ အမှီကောင်းဖြစ်တဲ့ ဆရာသမားတပါးရဲ့အကြောင်း တင်ပြမှာ ဖြစ်ပါတယ်။

မိမိ ၁၃-နှစ်သား အရွယ်မှာ မြောင်းမြမြို့၊ ရိုးကူးရပ်၊ ပညာဇေယျုံကျောင်းတိုက်မှာ ၂-နှစ်တိတိ နေခဲ့ပါတယ်။ အဲဒီ ကျောင်းတိုက်က ရုံးအလုပ်နဲ့ပတ်သက်တဲ့ လက်ရေးတို၊ လက်နှိပ်စက်၊ စာရင်းကိုင်ပညာတွေကို အဓိကထားပြီး သင်ပေးတဲ့ ကျောင်းတိုက်ဖြစ်ပါတယ်။ ပါဠိစာပေစတဲ့ လောကုတ္တရာပညာကို သင်ကြားပေးတဲ့ စာသင်တိုက်မျိုး မဟုတ်ပါဘူး။

မိမိဟာ ပါဠိစာပေကျမ်းဂန်တွေကို သင်ယူလေ့လာချင်လို့ ၁၉၅၅-ခုနှစ် ဇူလိုင်လမှာ မြောင်းမြမြို့၊ ညောင်လေးပင်ရပ်ရှိ ပဇ္ဇောတာရုံ ပါဠိတက္ကသိုလ်ကျောင်းတိုက်ကြီးမှာ ပြောင်းရွှေ့နေထိုင်ဖို့ စီစဉ်ခဲ့ပါတယ်။

ပဇ္ဇောတာရုံကျောင်းတိုက်မှာ နေထိုင်ဖို့အတွက် ပညာဇေယျုံကျောင်းမှ ရခိုင်ဦးပဇင်းကြီး ဦးဒေဝိန္ဒက မိမိကို ကူညီခဲ့ပါတယ်။

တနေ့မှာ ဦးဒေဝိန္ဒက မိမိကို “မောင်ဣန္ဒက၊ ကိုရင်က အသက်ငယ်သေးတယ်၊ ဗုဒ္ဓဘာသာ ပါဠိစာပေ ကျမ်းဂန်တွေကို သင်ယူသင့်တယ်၊ ကိုရင် ပဇ္ဇောတာရုံတိုက်မှာ နေချင်ရင် ငါ လိုက်ပို့ပေးမယ်၊ ငါ့သူငယ်ချင်း ရခိုင်ဦးပဇင်း ဦးဣန္ဒကဆိုတာ ရှိတယ်၊ ကိုရင်နဲ့ ဘွဲ့တူပဲ၊ သူက ကိုရင်ကို အာမခံရင် ကိုရင် အဲဒီကျောင်းတိုက်မှာ နေလို့ရနိုင်တယ်၊ ဘယ်နှယ်လဲ” လို့ မေးပါတယ်။

မိမိက နေဖို့ သဘောတူလို့ ဝါမဝင်မီ တပတ်အလိုမှာ ဦးဒေဝိန္ဒက မိမိကို ပဇ္ဇောတာရုံကျောင်းတိုက်သို့ ခေါ်ဆောင်သွားခဲ့ပါတယ်။

သူ့ရဲ့ သူငယ်ချင်း ဦးဣန္ဒကနဲ့ တွေ့ပြီး သူတို့အချင်းချင်း ရခိုင်လို ပြောကြဆိုကြတယ်။ သူတို့ပြောတာကို မိမိ နားမလည်ပါဘူး။

ပြီးမှ ဦးဣန္ဒက,က မိမိကို “ကိုရင် ဒီမှာ နေရဖို့အတွက် အာမခံပုဂ္ဂိုလ် နှစ်ပါးရှိရတယ်၊ ကျုပ်က ကိုရင့်ကို အာမခံပေးရမှာ၊ ကျုပ်ပြောတဲ့စကားကို နားထောင်နိုင်ပါ့မလား”လို့ ရခိုင်သံ ဝဲတဲတဲနဲ့ မေးပါတယ်။

မိမိက “နားထောင်ပါမယ် ဘုရား”လို့ အလိုက်သင့်စွာပဲ ဖြေလိုက်ပါတယ်။ စိတ်ထဲကတော့ သိပ်ပါလှတာ မဟုတ်ပါဘူး။ စာသင်တိုက်ကြီးတွေမှာ မနေခဲ့ဖူးလို့ သံဃာနှစ်ရာနီးပါးရှိတဲ့ ရွှေကျင်စာသင်တိုက်ကြီးတတိုက်မှာ မိမိ ပြောင်းရွှေ့နေရမှာကို အားငယ်နေမိပါတယ်။ ပြီးတော့ မိမိဟာ ဆေးလိပ်ကို အစွဲကြီး စွဲနေပြီဖြစ်လို့ ဆေးလိပ်မသောက်ရတဲ့ ပဇ္ဇောတာရုံတိုက်မှာ နေလို့မှ ဖြစ်ပါ့မလားလို့လဲ တွေးပြီး ပူနေမိပါတယ်။

ဦးဣန္ဒက,က မိမိကို သင်္ကန်းလက်ကန်တော့ထိုးပုံ သင်ပြပေးပြီးနောက် တိုက်အုပ်ဆရာတော်ဘုရားဆီ ခေါ်သွားခဲ့တယ်။

မျက်မှန်ဒီဂရီအထူကြီးကို တပ်ထားတဲ့ တိုက်အုပ်ဆရာတော်ဟာ ကျောင်းတိုက်အလယ် တိုက်ဝါကြီးအောက်ထပ်မှာ သတင်းစာဖတ်နေပါတယ်။ မိမိတို့နှစ်ပါးက ဆရာတော်ကို ရိုသေစွာ ကန်တော့ကြပြီးနောက် အသာထိုင်၍ ဆရာတော်ရဲ့စကားကို စောင့်မျှော် နားဆင်နေပါတယ်။

“ဘာကိစ္စလျှောက်ဖို့ လာတာလဲ”လို့ ဦးဣန္ဒကကို ဆရာတော်က မေးတဲ့အခါ ဦးဣန္ဒက,က “ဒီကိုရင်လေးက ဒီတိုက်မှာ စာသင်ချင်တယ်ဆိုလို့ ဆရာတော်ထံ နေခွင့်တောင်းတာပါ ဘုရား”လို့ လျှောက်ထားပါတယ်။

ဆရာတော်က မိမိကို အကဲခတ်ကြည့်ပြီး “ဒီကိုရင်လေး ဘယ်မှာနေခဲ့သလဲ”လို့ မေးရာ ဦးဣန္ဒက,က “ပညာဇေယျုံကျောင်းမှာ တပည့်တော်မိတ်ဆွေ ဘုန်းကြီးနဲ့ အတူနေပါတယ် ဘုရား”လို့ လျှောက်ထားပါတယ်။

ဆရာတော်က “ဒီမြို့ထဲက လာတဲ့ စာသင်သားတွေကို ဒို့ သိပ်လက်မခံချင်ဘူး၊ ကျောင်းစည်းကမ်းတွေ ဖောက်တတ်ကြတယ်၊ ပြီးတော့ ဝါဆိုသံဃာစာရင်းလဲ ပြည့်နေပါပြီ၊ ဒါပေမယ့် ဒီကိုရင်ကလေး ကြည့်ရတာ ပြုပြင်လို့ရမယ့် လက္ခဏာရှိပုံရလို့ အာမခံရင် လက်ခံမယ်”လို့ အမိန့်ရှိလိုက်ရာ ဦးဣန္ဒက,က “တပည့်တော် အာမခံလုပ်ပါမယ် ဘုရား”လို့ လျှောက်ထားလို့ မိမိဟာ ပဇ္ဇောတာရုံကျောင်းတိုက်ကြီးမှာ နေခွင့်ရခဲ့ပါတော့တယ်။

ကျောက်ရိုင်းတုံးများဟာ ကျောက်သွေးကောင်းဆရာလက်ထဲ ရောက်တဲ့အခါ လှပတင့်တယ် ရှုစဖွယ် အဖိုးတန် ကျောက်မျက်ရတနာတွေ ဖြစ်လာကြရပါတယ်။ အဲဒီလိုပါပဲ ကျောက်ရိုင်းတုံးနဲ့တူတဲ့ ကလေးသူငယ်တွေလဲ ဆရာကောင်း သမားကောင်းများကို မှီခိုကြရတဲ့အခါ အသိအလိမ္မာ ပညာတွေ ကြွယ်ဝယဉ်ကျေးပြီး လူ့အဖိုးတန်တွေ ဖြစ်လာကြရပါတယ်။ ပဇ္ဇောတာရုံကျောင်းတိုက်ကြီးမှာ ပြောင်းရွှေ့လာခဲ့ပြီးနောက် တိုက်အုပ်ဆရာတော်ရဲ့ အုပ်ထိန်းစောင့်ရှောက်မှုအောက်မှာ ချမ်းသာပျော်ရွှင်စွာ နေထိုင်လာခဲ့ရလို့ မိမိအဖို့ ကျောက်သွေးကောင်းဆရာရဲ့ လက်ထဲရောက်ခဲ့ရတဲ့ ကျောက်ရိုင်းတုံးလေးတခုလိုကနေပြီး အဖိုးတန် ကျောက်မျက်ရတနာလေးလို ဖြစ်ခဲ့ရပါတော့တယ်။ ဆရာတော်ဟာ မိမိရဲ့ ကျန်းမာရေး ပညာရေးနဲ့ စားသောက်နေထိုင်ရေးတွေကို ကရုဏာ မေတ္တာ ကြီးမားစွာနဲ့ စောင့်ရှောက်ပေးခဲ့ပါတယ်။

တရက်မှာ မိမိဟာ ရာသီအပြောင်းအလဲကြောင့် ထင်ပါတယ်။ အတော် ဖျားနာနေခဲ့ပါတယ်။ အဲဒီအခါ ဆရာတော်က မိမိကို သူ့ကျောင်းမှာ ခေတ္တ ပြောင်းရွှေ့ထားပြီး ပြုစုစောင့်ရှောက်ပေးခဲ့တာကို ယခုအထိ အမှတ်ရနေလျက်ပါ။ သင့်တော်တဲ့ဆေးများကို တိုက်ကျွေးပြီး ဝမ်းချူပေးတဲ့အတွက် တပတ်အတွင်းမှာပဲ နေကောင်းသွားခဲ့ပါတယ်။ တိုက်အုပ်ဆရာတော်ဟာ အခြားဂိလာန စာသင်သား ရဟန်း သာမဏေတွေရဲ့ ကျန်းမာရေးကိုလဲ မိမိလိုပင် ဂရုတစိုက် စောင့်ရှောက်ပေးလေ့ရှိပါတယ်။ မြတ်စွာဘုရားကိုယ်တော်တိုင် ဂိလာနရဟန်းတပါးကို ရေချိုးပေးပြီး ပြုစုစောင့်ရှောက်တာကို အတုယူပြီး ဆရာတော်ဟာ တပည့်စာသင်သားတွေရဲ့ ကျန်းမာရေးကို ကရုဏာထား ပြုစုစောင့်ရှောက်တာဖြစ်ပါတယ်။

မိမိ ပဇ္ဇောတာရုံ ရောက်ခါစက မပျော်လှပါ။ အထူးသဖြင့် ဆေးလိပ်သောက်ချင်စိတ်ကို အတော်လေး မျိုသိပ်နေခဲ့ရပါတယ်။ ဒါပေမယ့် တိုက်အုပ်ဆရာတော်ရဲ့ ညွှန်ကြားချက်အတိုင်း အခြေခံပါဠိစာတွေကို သင်ရင်း စာထဲမှာ စိတ်ဝင်စားလာပြီး စာသင်ရတာ အတော်ပျော်မွေ့လာခဲ့ပါတယ်။ ဆရာတော်က မိမိရဲ့ စာကြိုးစားမှုကို ကြည့်ပြီး သူကိုယ်တိုင် သီးခြား စာသင်ပေးနေတဲ့ မန္တလေး-သကျသီဟစာမေးပွဲအတန်းမှာ မိမိကို တက်ခိုင်းခဲ့ပါတယ်။ အဲဒီအတန်းမှာ ဉာဏ်ကောင်းတဲ့ ကိုရင်ကလေး ငါးပါးကို ရွေးချယ်ပြီး သင်ပေးနေတာဖြစ်လို့ မိမိကိုပါ ထပ်သွင်းလိုက်တာဖြစ်ပါတယ်။ သင်ရတဲ့စာတွေက အတော်များတယ်။ အင်္ဂုတ္တိုရ်ပါဠိတော်၊ ဝိနည်းမဟာဝါပါဠိတော်၊ ဓမ္မပဒအဋ္ဌကထာ၊ သဒ္ဒါ၊ သင်္ဂြိုဟ်၊ ပုဒ်စစ်တွေ ဖြစ်ပါတယ်။

အခြားကိုရင်များက စာတွေ အတော်ရောက်နေကြပါပြီ။ မိမိမှာ ခုန်ကျော်ပြီး လိုက်ရလို့ အတော်ကြိုးစားသင်ယူရပါတယ်။ မန္တလေးကိုသွားပြီး စာမေးပွဲ ဝင်ရောက် ဖြေဆိုတဲ့အခါ ကိုရင်အားလုံး အာဂုံပြန်သာအောင်ပြီး ရေးဖြေမှာ ကျကြပါတယ်။ ဒါပေမယ့် ဒီစာမေးပွဲကျေးဇူးကြောင့် မိမိဟာ ငယ်၊လတ်၊ကြီးနဲ့ ဓမ္မာစရိယ၊ ပါဠိပါရဂူစာမေးပွဲတွေကို အကျအရှုံးမရှိဘဲ နှစ်ချင်းစွဲ အောင်မြင်ခဲ့ပါတယ်။ ဒါ့အပြင် ငယ်၊လတ်၊ကြီး စာမေးပွဲတွေကိုလဲ ပါဠိဘာသာနဲ့ ဖြေဆိုနိုင်ခဲ့ပါတယ်။

သာသနာ့ဝန်ထမ်း ရဟန်းတပါးဟာ စာပေတော်ရုံမျှနဲ့ မလုံလောက်သေးပါ။ သာသနာတော်မှာ သဒ္ဓါစိတ်ရှိဖို့လည်း များစွာ လိုပါတယ်။ အဲဒီ သဒ္ဓါစိတ်တွေ ဖြစ်ပေါ်လာအောင် ဆရာတော်ဟာ တပည့်စာသင်သားများကို ဆုံးမသြဝါဒ အထူးပေးပါတယ်။ ပဇ္ဇောတာရုံတိုက်မှာ စာသင်သားတွေဟာ အဖိတ်နေ့ညတိုင်း တိုက်အုပ်၊ တိုက်ကြပ်၊ စာချဆရာတော်များရဲ့ ဆုံးမသြဝါဒကို ခံယူကြရပါတယ်။ ကျောင်းတိုက်ရဲ့ အလယ်တိုက်ဝါကြီးအပေါ်မှာ တိုက်အုပ်ဆရာတော်နဲ့ စာချဆရာတော်များက ဆုံးမသြဝါဒကို အလှည့်ကျ ပေးကြပါတယ်။ တိုက်အုပ်ဆရာတော်ရဲ့ သြဝါဒတွေဟာ နာကြားလို့ မငြီးနိုင်ကြပါဘူး။ သာသနာတော်နဲ့ ပတ်သက်တဲ့ မှတ်သားစရာတွေ၊ အားကျစရာတွေ၊ အတုယူစရာတွေ၊ လောကီဗဟုသုတဖြစ်စရာတွေနဲ့ ပြည့်နေပါတယ်။

ဆရာတော်ရဲ့ သြဝါဒတွေကို နာကြားရလို့ တပည့်များမှာ တရားကျင့်ချင်တဲ့စိတ်တွေ၊ ဓုတင်အကျင့် ဆောက်တည်ချင်တဲ့ စိတ်တွေ၊ သံဃာ့ဝေယျာဝစ္စ ဆောင်ရွက်ချင်တဲ့ စိတ်တွေ၊ သာသနာပြုချင်တဲ့စိတ်တွေ ဖြစ်ပေါ်လာကြပါတယ်။

မိမိဟာ ကိုရင်ဘဝနဲ့ ကျောင်းတိုက်တွင်းရှိ သိမ်ကျောင်းကြီးမှာ တဆူတည်းရှိတဲ့ ဆင်းတုတော်ကြီးကို ဘုရားပန်းနဲ့ သောက်တော်ရေချမ်း သုံးနှစ်တိတိ နေ့စဉ် ဝတ်မပျက် ကပ်လှူခဲ့ပါတယ်။

သံဃာ့ဝေယျာဝစ္စနဲ့ ပတ်သက်ပြီး အရုဏ်ဆွမ်းချက်တာဝန်ကိုလည်း သုံးနှစ်တိတိ မညည်းမညူ ပြုလုပ်ခဲ့ပါတယ်။

ရှေးက သံဃာတော်များရဲ့ ကုဋီအိမ်သာတွေဟာ ခုလို ရေလောင်းအ်ိမ်သာ ကြွေခွက်တွေနဲ့ မတူပါဘူး။ ရေသယောက်မြောင်းတွေကို အိမ်သာကျင်းကြီးထဲမှာ ချထားပြီး အိမ်သာကျင်းမြောင်းကြီးကို နှစ်စဉ်နှစ်တိုင်း အနည်းဆုံး တနှစ်မှာ တကြိမ်လောက် ဆေးကြောသန့်ရှင်းပေးရပါတယ်။ ဒီသန့်ရှင်းရေးတာဝန်ကို ဆရာတော်ကိုယ်တိုင် ပြုလုပ်သန့်ရှင်းလေ့ရှိပါတယ်။ တနှစ်မှာ မိမိကို သူနဲ့ အိမ်သာကျင်းဆေးဖို့ ပြောရာ “ငါ့ကို ဆရာတော်က ချီးမြှောက်တာပဲ”လို့ တွေးပြီး မိမိလည်း ဝမ်းမြောက်ဝမ်းသာစွာဖြင့် ဆရာတော်ခိုင်းသလို ပြုလုပ်ပါတယ်။ ဆရာတော်နဲ့အတူ နေ့လယ် သံဃာတော်တွေ အနားယူချိန်မှာ အိမ်သာကျင်းကြီးထဲ ဆင်းပြီး ဆရာတပည့်နှစ်ဦးသာ သန့်ရှင်းရေး ပြုလုပ်ခဲ့ကြပါတယ်။

ဆရာတော်ဟာ အဲဒီလို သံဃာ့ဝေယျာဝစ္စတာဝန်တွေကို အောက်ခြေသိမ်း ဆောင်ရွက်တော်မူခဲ့ပါတယ်။

ဆရာတော်ဟာ လောကီ လောကုတ္တရာ စာပေအရာမှာ ထက်မြက်စူးရှလို့ ရဟန်းပညာရှင်၊ လူပညာရှင်တွေက ဆရာတော်ကို အထူးလေးစားကြပါတယ်။ ဒါကြောင့် ဦးဥက္ကဋ္ဌရဲ့ လူသေလူဖြစ်အဆုံးအဖြတ် ဝိနိစ္ဆယကိစ္စ ဖြစ်ပေါ်လာတဲ့အခါမှာ ဆရာတော်ကို ဝိနိစ္ဆယရဲ့ အဓိကအဖွဲ့ဝင်အဖြစ် သံဃာတော်များက ရွေးချယ်ကြခြင်း ဖြစ်ပါတယ်။

ဆရာတော် ဦးဆောင်ပြီး ဆုံးဖြတ်ရေးထားတဲ့ “လူသေလူဖြစ် ဝါဒါနုဝါဒ ဝိနိစ္ဆယကျမ်းကြီး”မှာ ဆရာတော်ရဲ့ ပညာပြည့်စုံမှုကို ကြည်ညိုနိုင်ပါတယ်။

ဆရာတော်ဟာ မြန်မာစာပေနဲ့ပတ်သက်ပြီး မြန်မာ့သမိုင်းနဲ့ မြန်မာကဗျာမှာလဲ နိုင်နင်းပါတယ်။ ဆရာတော် ဆုံးမသြဝါဒ ပေးတဲ့အခါမှာ မြန်မာ့သမိုင်းက သိမှတ်စရာတွေကို ထုတ်ဖော်ပြောပြ ဆုံးမလေ့ရှိပါတယ်။ ကဗျာဉာဏ်လဲ အလွန်ကြီးပါတယ်။ ဆရာကြီးသခင်ကိုယ်တော်မှိုင်းရေးတဲ့ လေးချိုးကြီးတွေလို လေးချိုးကြီးမျိုးကိုလဲ တထိုင်တည်းနဲ့ ရေးစပ်နိုင်ပါတယ်။ တနေ့မှာ ဆရာတော်က မိမိကို ဖောင်တိန်ပေးပြီး စာရေးစားပွဲမှာ အထိုင်ခိုင်းပါတယ်။ ဆရာတော်က မိမိရှေ့မှာ လမ်းလျှောက်ပြီး လေးချိုးကဗျာကြီး စပ်ဆိုနေတာကို မိမိက လိုက်ရေးရပါတယ်။ အဲဒီတုန်းက မိမိက ကိုရင်ငယ်ဘဝဖြစ်လို့ လေးချိုးရဲ့ အဓိပ္ပာယ်ကိုတော့ ကောင်းကောင်းမသိပါဘူး။ နောက် မကြာမီ အထူးထုတ်သတင်းစာတစောင်ထဲမှာ ဆရာတော်ရဲ့ လေးချိုးကြီး ပါလာခဲ့ပါတယ်။ မိမိဟာ မြန်မာစာစီစာကုံးရေးပုံ၊ အခြေခံကဗျာစပ်ပုံတွေကို ဆရာတော်ဆီမှာပဲ သင်ကြားခဲ့ရပါတယ်။

အသက်ငယ်ရွယ်စဉ်မှာ ခုလို အရည်အချင်းမျိုးစုံနဲ့ ကုံလုံပြည့်ဝတဲ့ ဆရာတပါးကို မှီခိုခဲ့ရလို့ မိမိရဲ့ဘဝ တိုးတက်ပြောင်းလဲခဲ့ခြင်း ဖြစ်ပါတယ်။ မိမိဟာ ပင်ကိုယ်က စိတ်ဓာတ်ကြမ်းတမ်းသူ တဦးပါ။ ဒေါသကြီးသူ၊ ဇွတ်တရွတ်လုပ်တတ်သူတဦး ဖြစ်ပါတယ်။ ဆရာတော်ရဲ့ ပဲ့ပြင်ဆုံးမမှုတွေကို ရလာလို့ စိတ်ဓာတ်တွေဟာ တဖြည်းဖြည်း နူးညံ့သိမ်မွေ့လာခဲ့ပါတယ်။ သူတော်ကောင်းနဲ့ ပေါင်းသင်းရလို့ သူတော်ကောင်းစိတ်ဓာတ်တွေ ကူးစက်လာတာပါ။

ဆရာတော်ဟာ ကိုရင်ကလေးတွေကို ဘုရားသားတော် ရှင်ရာဟုလာအကြောင်းကို အတုယူကြရန် ပြောပြ ဆုံးမလေ့ရှိပါတယ်။ ရှင်ရာဟုလာဟာ သဲပွင့်တွေကို လက်နဲ့ဆုပ်ပြီး “ဒီလက်မှာရှိတဲ့ သဲပွင့်ကလေးတွေ အရေအတွက်နဲ့အမျှ အဆုံးအမကို ခံယူရရင် ကောင်းပေစွ”လို့ နေ့တိုင်း မြွက်ဆိုလေ့ရှိပါသတဲ့။

အဲဒီလို အဆုံးအမတွေကြောင့် ပဇ္ဇောတာရုံတိုက်မှ သံဃာတော်များဟာ ကြည်ညိုဖွယ်ကောင်းတဲ့ ဣနြေ္ဒသိက္ခာတွေ ရှိကြပါတယ်။

တရက်မှာ ရှင်သာရိပုတ္တရာမထေရ်ရဲ့ ညီအငယ်ဆုံးဖြစ်တဲ့ ရှားတောကြီးထဲမှာ တောရဆောက်တည်နေတဲ့ ခဒိရ ရှင်ရေဝတကလေးအကြောင်းကို ဆရာတော်က ချီးမွမ်းစကား ပြောဆိုဆုံးမခဲ့ရာ နောက်တရက်မှာတော့ ကိုရင်ငယ်လေးတစု တောထွက်သွားခဲ့ကြပါတယ်။ နောက်မှ ဆရာသမားတွေက လိုက်ရှာပြီး ပြန်ခေါ်ခဲ့ကြရပါတယ်။

ဆရာတော်ဟာ ပြည်တွင်းသာသနာပြုလုပ်ငန်းများကို ဆောင်ရွက်နေရုံမျှဖြင့် တင်းတိမ်အားရမှု မရှိခဲ့ပါဘူး။

ကမ္ဘာ့သာသနာပြုဆရာတော် အရှင်သေဋ္ဌိလာဘိဝံသ၊ မူလပဋ္ဌာန်းဆရာတော် အရှင်နာရဒတို့လို ပြည်ပသာသနာပြုလုပ်ငန်းတွေကိုလဲ ဆောင်ရွက်ဖို့ ဆန္ဒပြင်းပြနေပါတယ်။

ပြည်ပသာသနာပြုလုပ်ငန်းများကို အောင်မြင်အောင် ပြုလုပ်လိုရင် အင်္ဂလိပ်စာကို ကောင်းကောင်း တတ်သိနားလည်ရပါမယ်။ ဝိဇ္ဇာသိပ္ပံတက္ကသိုလ်ပညာရပ် ဘွဲ့တခုခု ရှိရပါမယ်။ အဲဒီ အရည်အချင်းတွေနဲ့ ပြည့်စုံဖို့အတွက် ၁၉၅၈-ခုနှစ်မှာ ဆရာတော်ဟာ နောက်ပါ ကပ္ပိယကျောင်းသား မောင်ချစ်လှိုင်နဲ့အတူ အိန္ဒိယနိုင်ငံကို ပညာသင်ဖို့ ကြွသွားခဲ့ပါတယ်။

အဲဒီအချိန်မှာ မိမိဟာ ပထမငယ်တန်းစာမေးပွဲ ဝင်ရောက် ဖြေဆိုဖို့ ပြင်ဆင်နေချိန် ဖြစ်ပါတယ်။ ဆရာတော်ဆီက စာပေအခြေခံကောင်းကို ရခဲ့လို့ အငယ်တန်း စာဝါတွေကို လွယ်လွယ်ကူကူ လိုက်နိုင်ခဲ့ပါတယ်။ အငယ်တန်းက စပြီး ပါဠိပါရဂူတန်းအထိ စာမေးပွဲတွေကိုတော့ အခြား အမှီကောင်း ဆရာသမားများ ဖြစ်ကြတဲ့ မှော်ဘီ သာသနာ့ဝန်ဆောင် ဆရာတော် အရှင်ကုမာရ၊ ပါဠိပါရဂူနည်းပြ ဆရာတော် အရှင်ဣန္ဒဝံသ၊ ဓမ္မာစရိယမျက်ရှုကျမ်းပြုဆရာတော် အရှင်ကာရုဏိကတို့ရဲ့ သင်ကြားပြသမှုနဲ့ မပင်မပန်း အောင်မြင်ခဲ့ပါတယ်။

ဆရာတော် အိန္ဒိယက ပြန်ကြွလာတဲ့အခါ မိမိဟာ ဆရာတော်ဆီမှာ စာချဘုန်းကြီးကလေးဘဝနဲ့ တနှစ်နီးပါး နေထိုင်ပြီး ကိုယ်တိုင်လဲ အခြေခံအင်္ဂလိပ်စာနဲ့ သက္ကတစာပေတွေကို ဆရာတော်ဆီမှာပဲ သင်ယူခဲ့ပါတယ်။ ကျန်းမာရေးမကောင်းလို့ ၁၉၆၉-ခုနှစ်မှာ ပဇ္ဇောတာရုံတိုက်ကြီးက အပြီးအပိုင် ထွက်ခဲ့ရပါတယ်။

အဲဒီအချိန်က စပြီး မိမိမှီခိုခဲ့ရတဲ့ ဆရာသမားတွေရဲ့ ဂုဏ်ကျေးဇူးတွေကြောင့် နေရာတကာမှာ မျက်နှာမငယ်ရဘဲ နေခဲ့ရတာဟာဖြင့် ယနေ့အချိန်ထိပဲ ဖြစ်ပါတယ်။

၁၉၇၃-ခုနှစ် ရှမ်းပြည်နယ်အရှေ့ပိုင်း တာချီလိတ်မြို့ကလေးမှာ ငွေတောင်ဦးကမ္မဋ္ဌာန်းကျောင်းတိုက်ကို တည်ထောင်ပြီး နယ်ခြားသာသနာပြုလုပ်ငန်း စတင် ဆောင်ရွက်ခဲ့ရာ ထင်တာထက်ပင် ပိုမို အောင်မြင်ခဲ့ပါတယ်။

တာချီလိတ်မြို့မှာ နေထိုင်စဉ်က ကျေးဇူးတော်ရှင် မဟာစည်ဆရာတော်ဘုရားကြီးဆီမှာ ဝိပဿနာဓုရကို နည်းခံ ကျင့်သုံးခွင့် ရခဲ့ပါတယ်။ မိမိအဖို့ အမှီကောင်းတပါးကို ထပ်ပြီး မှီခိုရခြင်း ဖြစ်ပါတယ်။

ကျေးဇူးတော်ရှင် မဟာစည်ဆရာတော်ဘုရားကြီးရဲ့ ဂုဏ်ကျေးဇူးကြောင့် ၁၉၈၂-ခုနှစ်မှာ အမေရိက ပြည်ပသာသနာပြုလုပ်ငန်းတွေကို ဆောင်ရွက်ခွင့် ရခဲ့ပါတယ်။

အဲဒီအချိန်မှာ မြောင်းမြဆရာတော်ဘုရားကြီးက အင်္ဂလန်နိုင်ငံမှာ နေထိုင်ပြီး သာသနာပြုနေပါပြီ။

ဆရာတော်ဘုရားဟာ ဘဝနတ်ထံ စံလွန်တော်မမူမီမှာ တိသရဏ ဝိဟာရကျောင်းတော်များကို သြစတြေးလျနိုင်ငံ ပါ့သ်မြို့မှာ တကျောင်း၊ အင်္ဂလန်နိုင်ငံ လန်ဒန်မြို့မှာ တကျောင်း တည်ထောင်ပြီး ပြည်ပသာသနာပြုလုပ်ငန်းတွေကို ဆောင်ရွက်သွားနိုင်ခဲ့လို့ ဆရာတော်ဘုရားရဲ့ အလိုဆန္ဒတွေ ပြည့်ဝအောင်မြင်သွားခဲ့ပါတယ်။

မိမိအပေါ်မှာ အလွန်တရာ ကျေးဇူးများလှတဲ့ ဆရာတော်ဘုရားကြီးရဲ့ ကျေးဇူးတော်အနန္တတွေကို ရိုသေမြတ်နိုး လက်စုံမိုးပြီး အကြိမ်ကြိမ် ရှိခိုးဦးချရပါတယ်။

အရှင်ဣန္ဒက

၁၈-စက်တင်ဘာ-၂၀၀၁

(၂၀၀၁ ဇူလိုင်-သြဂုတ်လထုတ်၊ အတွဲ-၁၁ အမှတ်-၃ လောကချမ်းသာစာစောင် မှ)